Este 16 de decembro comeza unha gran aventura para seis institutos galegos que traballarán durante todo o curso nun proxecto educativo que pretende achegar a realidade dos países do Sur a máis de 500 mozas e mozos galegos.
O alumnado participante na cuarta edición do proxecto de educación para o desenvolvemento ‘Cooperación Galega: O mundo que queremos’, terá de coñecer as problemáticas que afectan aos países empobrecidos, pero tamén aos seus propio entorno, a través de dinámicas innovadoras e participativas como os obradoiros de radio e fotografía, o teatro foro ou a visita de persoas beneficiarias de proxectos de cooperación ás súas escolas.
As ONG Solidaridade Internacional de Galicia, a Asociación Galega de Reporteir@s Solidari@s (Agareso), Educo, Asemblea de Cooperación pola Paz (ACPP), 100Tolas e Tempo de Loaira únense neste proxecto para potenciar a educación en valores, combater os prexuízos e contribuír a educar cidadáns máis críticos e propositivos. Os institutos que este apostaron por esta iniciativa son IES David Buján (Cambre, A Coruña), CPI Cabo da Área (Laxe, A Coruña), IEs Isidro Parga Pondal (Carballo), IES Pintor Colmeneiro (Silleda, Pontevedra), IES Fomiñá (Pastoriza, Lugo) e IES Valadares (Vigo, Pontevedra).
Este proxecto divídese en varias estacións, con paradas moi diferentes, pero deseñadas para que ao final do curso o alumnado teña unha visión máis completa, tanto dos contidos que aborda a cooperación internacional como das ferramentas que teñen na súa man para contribuír á loita contra a desigualdade.
Na primeira parada que comeza hoxe no IES David Buján de Cambre e o IES Valadares de Vigo achegarémonos aos centros educativos para explicarlles ao noso alumnado en que consiste o noso proxecto e que esperamos desta aventura. Dinámicas como os xogos de rol ou o xogo de cadeiras facilitarán ao alumnado o debate e a reflexión sobre temas como a pobreza, o desenvolvemento sostible, a corresponsabilidade… conceptos complexos, pero que a través de accións lúdicas son máis sinxelos de incorporar para o alumnado. Esta primeira estación será o 19 de decembro no IES Fomiñá de A Pastoriza e o día 20 nos IES Parga Pondal de Carballo e Pintor Colmeneiro de Silleda. Esta primeira fase será elaborada pola ONG Educo.
A segunda parada xa chegará no mes de xaneiro do 2017 cos obradoiros de radio e fotografía. Parte central do proxecto porque buscan que os rapaces e rapazas interioricen as problemáticas abordadas a través de ferramentas de comunicación e facelos partícipes da solución a través de accións de denuncia. Os obxectivos da segunda sesión destes obradoiros é coñecer mellor os medios de comunicación e a súa vertente máis social, reflexionar, facernos máis críticos e donos do noso propio discurso, fomentar a creatividade e organizarse para traballar en equipo. Nesta sesión abordaremos a problemática escollida para a aula, trazaremos un plan de acción para conseguir a información, os audios ou as imaxes necesarias para construír o noso produto de comunicación, e formaremos os equipos. Na terceira sesión no mes de febreiro construirase o produto comunicativo para a súa difusión. Esta segunda fase é impartida pola ONG AGARESO.
Na terceira parada no mes de marzo, a través da metodoloxía do Teatro Foro, unha das técnicas do Teatro d@s Oprimid@s, as compañeiras do colectivo 100Tolas convidarán o alumnado a coñecer a Ana e a súa viaxe. Vivirán con ela a súa historia e compartirán as dificultades que se vai atopando neste camiño. Para ao final entre todas e todos buscar alternativas ás situacións de opresión que vive Ana só polo feito de ser muller e migrante. Traballarase a través desta historia o tema do racismo, a inmigración e a desigualdade e a violencia de xénero… problemáticas que o alumnado terá que saber identificar na vida cotiá de Ana, pero sobre todo terá que ser partícipe da súa solución aportando alternativas.
A última parada será no mes de abril coa visita de dúas mulleres de República Dominicana, que a través das súas experiencias vitais e a súa colaboración con proxectos de cooperación realizados no país caribeño pola ONG Asemblea de Cooperación pola Paz contaránlle ao alumnado como loitan contra a desigualdade desde as súas comunidades e intentarán desmontar moitos dos prexuízos que existen sobre os países empobrecidos.
A traca final será a presentación de todo o traballo feito durante o ano nos diferentes concellos dos centros educativos no mes de xuño. Estas presentacións teñen o obxectivo de amplificar as mensaxes elaborados polo alumnado e convidar ao resto da comunidade educativa a coñecelas.
‘Cooperación Galega: O mundo queremos’ é un proxecto financiado pola Dirección Xeral de Relacións Exteriores e coa UE, e que forma parte da plataforma de innovación educativa ‘Plan Proxecta’, impulsada pola Consellería de Cultura, Educación e Ordenación Universitaria.